Eit hotell med omtanke

Gordon Hotel på Reed har røter tilbake til 1700-talet, då vegen langs Breimsvatnet og skyss- og postruter gjennom Nordfjord trengte stoppestad. Frå 1817 finst dokumentasjon på at det vart drive gjestgiveri og skyss-verksemd på staden som seinare vart til Gordon.

I 1880-åra fekk stedet ny giv. Rundt 1884 vart hovudbygningen reist av Lars Johannesson Reed — eit trehus bygd for gjester og reisande. Hotellet vart omtalt som «godt og pent» i reisehandbøker frå 1888, og fekk raskt ein posisjon som viktig overnattings- og samlingsstad i området.

Frå 1890-åra og inn i 1900-talet fungerte Gordon ikkje berre som hotell, men også som landhandel og sosial møteplass for bygda – med butikk, skysstasjon og samlingar. I 1892 heldt til dømes Sandane Hornmusikk sin første konsert der.

Gjennom 1900-talet var hotellet eit naturleg knutepunkt for fiskarar, tilreisande og turistar som søkte naturopplevingar ved vatnet og i fjella rundt. Gordon gav overnatting, servering og eit viktig tilbod i ei tid då transport og infrastruktur var i endring.

I dag blir historia skriven vidare med same omsorg og gjestfridom som huset alltid har vore kjent for. Vi har restaurert Gordon med respekt for historia, samstundes som vi har skapt eit moderne hotell der komfort, ro og kvalitet står i sentrum.

Når du kjem til Gordon Hotel, kjem du ikkje berre til eit hotell. Du kjem inn i hus med sjel, der veggane fortel historier, peisen framleis samlar folk, og vertskapet ønskjer deg velkomen heim.

På Gordon Hotel trur vi at dei beste husa er dei som får leve vidare. Difor har restaureringa handla om langt meir enn å byggje nytt – ho har handla om å ta vare på det som allereie finst.

Gjennom arbeidet har vi bevart originale detaljar der det har vore mogleg, og gitt gammalt materiale nytt liv i andre delar av huset. Det som kunne brukast igjen, har fått bli verande ein del av historia.

Vi har òg leita etter kvalitet utanfor Gordon sine eigne veggar. Møblar, interiør og bygningsdelar er henta frå Bergen, Ås, Drammen, Bø, Sandefjord, Fredrikstad, Vestby, Molde, Ulsteinvik, Førde – og sjølvsagt frå Gloppen. Kvar gjenstand har si eiga historie, og har no fått ein ny plass hos oss.

I Matstova dekkjer vi borda med serviset etter den folkekjære musikaren og kunstnaren Petter Eide. På romma søv du under dyner og puter frå Norsk Dun, fylte med resirkulert kvalitetsdun som har fått nytt liv. Vi trur ikkje at berekraft handlar om å kjøpe mest mogleg nytt.

Vi trur det handlar om å ta vare på det som har verdi, velje kvalitet som varer, og skape noko som kan gleda nye generasjonar.

Det er slik Gordon Hotel blir bygd – med respekt for historia, omtanke for framtida og kjærleik til godt handverk.